Brakkasamtökin hafa stofnað styrktarsjóð undir nafninu Iðunnarbrunnur.

Nafn sjóðsins heiðrar minningu, Iðunnar Geirsdóttur, sem var ein af stofnfélögum samtakanna. Iðunn lést úr krabbameini langt fyrir aldur fram þann 21. apríl 2018.

Dóttir Iðunnar, Berglind Eir Ásgeirsdóttir, hafði lofað sjálfri sér þegar hún var yngri að ef mamma hennar myndi missa hárið aftur myndi hún gera það með henni. Það var svo í apríl 2018 sem hún lét raka af sér hárið og safnaði áheitum til styrktar Brakkasamtökunum. Mamma hennar hafði veitt henni innblásturinn til að styrkja samtökin sem hún var innilega stolt af. Berglind safnaði um 500.000 krónum sem runnu til samtakanna og hefur verið ákveðið að það verði stofnfé styrktarsjóðsins.

Fjármögnun sjóðsins verður með innkomu áheita á samtökin í Reykjavíkurmaraþoni Íslandsbanka. Einnig verða öll framlög einstaklinga, fyrirtækja og félaga vel þegin.

Styrktarsjóðurinn er aðallega hugsaður til að koma til móts við gistikostnað kvenna af landsbyggðinni vegna áhættuminnkandi aðgerða og þurfa oft að dveljast lengi að heiman.

Endurgreiðsla:
Brakkasamtökin taka þátt í að niðurgreiða kostnað á íbúðum og dvöl á sjúkrahóteli, íbúðum KÍ eða verkalýðsíbúðum vegna áhættuminnkandi aðgerða.

Samtökin gera kröfu um að styrkþegi sé félagsmaður í Brakkasamtökunum til að geta sótt um endurgreiðsluna.

Styrkupphæð fer eftir stöðu sjóðsins.

Til að fá endurgreiðslu þarf að uppfylla eftirfarandi skilyrði:

1. Vera félagsmaður í Brakkasamtökunum, árgjaldið er 3500 kr.
2. Greiða reikning vegna gistidvalar.
3. Skila inn frumriti af reikningnum, ásamt nafni, kennitölu og reikningsnúmeri á brca@brca.is

Þeir sem vilja styrkja sjóðinn er bent á að hafa samband við samtökin og/eða leggja sitt af mörkum hér: Kt. 571215-2250